西貢行大運

是咁的，我呀爺嘅寶貝酒樓永和記月尾執笠*

加上不孝 me 已經好耐無入西貢

於是周日就去行咗個大運（！！！！！）

我妹怕我賴床放飛機，搞到我仲毒誓

話起唔到身就送哂新買啲衫畀佢（！）

永和記嘅特色就係一堆吹水嘅呀伯sssssss

因此點心好唔好食只係點綴 XD

臨別秋波，點心好咗少少咁大把

由於真係 OK 不濟，無乜點影相

後來爸爸叫嗰籠潮洲粉果真係無得輸

每一舊都係黐住的（！）笑到癲咗

茶友呀伯先生（呀爺個 best frd XD）：兩公婆咁煙韌就好囉

而我食過嘅「代表作」係迷你蝦餃

食家呀爺評論：呢啲係手指尾蝦餃嚟！得隻手指尾咁細！

另外仲有變味雞扎，口味新奇可口，值得一讚

同埋棉胎腸粉，一團嘢咁堅保暖，好過打邊爐

見到啦，除咗同啲呀伯傾偈，一路彈一路食係另一賣點

就好似睇 TVB 膠劇咁，啲人都係為咗鬧啲劇情垃圾先集集追

不過喺開飯網竟然都有十個 :) （！）斷估呢間頹嘢無錢落廣告格....

爸爸話晏晝啲燒味飯都唔錯嘅

夜晚通常係飲宴先會去，正正常常味囉

當然啦，主菜仍然係嗰堆呀伯

茶友呀伯先生平時講嘅笑話，同《真係笑話》簡直不可同日而喻

有次佢話去行山（？）畀蜜蜂針到紅紅腫腫

話鋒一轉：夜晚返到屋企同老婆打毒針先，嘻嘻

嘩頂我內心笑到不行，但又要扮聽唔明呢啲黃調笑話（！）

忍到我死死下

見永和記就摺，影咗張即影即有

妹妹將我嗰張畀咗呀爺

送咗佢自己張玉照畀我 $%^&**&^%

---------------------------------------------------------------------------------------------

之後就勁抽喇......... 我同妹妹又去飲茶（同日！）

因為我呀嫲就好痛恨永和啲嘢難食，我呀爺就要同永和啲茶友吹水

結果佢哋係分開飲茶的（！！！！！！）

聰明嘅妹妹晨早留定肚走下場

我就完全唔記得囉，仲喺度食食食，中伏喇

呀嫲以前就鍾意去東園，更明言：我死都唔會去第間架喇！

嗯，後來東園就執咗哈哈哈哈

早排就去海傍附近間唔記得咩記（哈哈！）總之又執咗啦

而家就去洪記多，有時去全記

（兩者夜晚皆賣海鮮，我當然無食過啦，咁貴）

夜晚好多人嚟西貢食海鮮，酒樓外邊都有檯凳

畀人一邊食海鮮、一邊睇景

連朝早飲茶都可以坐出去（！）哈哈哈

不過呀嫲話熱，都係上咗樓上雅座 XD

點心水平當然都係麻麻啦

重點係我想講下我到底有幾飽！！！！！！！

話說我已經食第二餐架啦，呀嫲仲會慌死你唔飽（！）

你話飽就好掃興架嘛

所以我哋飽到頂上隻眼都會話：頭先唔係唔係食咗好多嘢之嘛 ^^

而我呀嫲就好頂癮嘅，專唔食點心架喎

叫埋哂啲無敵飽肚嘅嘢 T___T

例如：粥呀、雲吞（？！）、煎釀三寶（！！！！）、油菜之類

菜都飽？無錯，嗰碟菜真係一大碟 orz...

呢排凍凍哋，呀嫲搞搞新意思叫咗個蠟味飯！

人類果然係無極限嘅！爆 seed 喇！

好彩今次有妹妹加持

上次我自己同呀嫲飲茶，一個人要食三粒燒賣！

呀嫲必殺技：叫叫叫叫叫叫叫勁多嘢，只吃一口

佢係太后嚟，嗚呀呀呀

---------------------------------------------------------------------------------------------

後記

請咗呀嫲飲茶之後，佢好開心，塞咗一堆生果畀我
（呀爺呀嫲賣生果的）
而星期日我又要帶啲衫褲返 hall 著
於是我先攞一抽水果返屋企攞衫
然後一抽水果加一抽衫褲去 • 鴨 • 脷 • 洲 • 補 • 習！
補完習再左一袋右一袋返 hall T____T

---------------------------------------------------------------------------------------------

註

* 其實係想易手，不過我爸話齋：係驚食唔返呢啲「水準」！